Mondial 2011-RUGBY : Handeha mivantana etsy Mahamasina ireo lalao 17

Miaina kely ny mpankafy baolina lavalava. Halefa mivantana etsy amin’ny kianjaben’i Mahamasina ireo lalao 17 eo amin’ny fiadiana ny ho tompondaka eran-tany ho an’ny rugby, izay hatao any Nouvelle Zélande amin’ny 9 septambra hatramin’ny 23 oktobra ho avy izao.

Ny fiaraha-miasa eo amin’ny kaominina Antananarivo renivohitra (amin’ny alalan’ny fanomezana ny kianja sy ireo fitaovana handefasana mivantana ny lalao) sy ny rafitra mitantana ny rugby malagasy tamin’ny fikatsahana mpiara-miombon’antoka (Canal Plus sy ny minisiteran’ny Fanapariaham-pahefana sy ny fanajariana ny tany) no nahazoana izany. “Hetsika lehibe tsy azo hodian-tsy hita ny atao any Nouvelle Zélande, ka nahatonga anay hitady hevitra hahazoan’ny vahoaka ny lalao na dia ampahany fotsiny aza no hita“, hoy i Fenohasina Rakotomalala, filohan’ny ligin’Analamanga ho an’ny baolina lavalava.

Isan’ireo arahintsika amin’izany ny fihaonan’ny All Blacks sy Tonga (9 septambra), izay hoentina hanokafana ny lalao sy ny fifandonan’ izy ireo amin’ny Frantsa (24 septambra). “Hanampy azy ireo ihany koa ireo lalao ampahefadalana sy ireo lalao hafa“, araka ny nambaran’i Fenohasina Rakotomalala hatrany.

“Tsy misy hampiasaina ny kianjaben’i Mahamasina amin’ity fa ho eny amin’ny tribune sy ny gradin ireo mpijery an’ireo lalao ireo“, hoy i Mamy Ramiarinarivo, talen’ny fotodrafitrasa eo anivon’ny kaominina Antananarivo renivohitra. Andrasana izay fomba hahafahan’ireo mpankafy ny taranja any ivelan’Antananarivo manaraka an’ity taranja ity.

Roméo Andriamihaja